Urriðafossvirkjun aftur inni hjá tilvonandi Fló(ð)ahreppi.

Hafa Landsvirkjunarmenn þennan gífurlega sannfæringarkraft? Ég veit það ekki en þeir náðu þeim merka áfanga í dag að fá sveitastjórn Flóahrepps til þess að taka Urriðafossvirkjunina aftur inn í aðalskipulagstillögu og kynna skipulagið með eða án virkjunar fyrir íbúana á næstu dögum. Var sveitastjórnin ekki búin að samþykkja að taka hana út úr drögum að aðalskipulagi sólarhring fyrr?Núna hefur Landsvirkjun ákveðið að gefa þeim "smá bætur" fyrir óafturkræfanleg umhverfisspjöll (eins og ég skil það). Það þurfti ekki meira til til þess fá heimamenn til að skipta um skoðun. Eins og ég var ánægður með þá og stoltur fyrir að láta skynsemina ráða og hafna virkjuninni. 

 Sveitastjórnin hefur vald til þess að segja já og nei. Stundum er betra að segja nei eins og í þessu tilviki og standa fast við sína skoðun enda höfðu menn komist að þeirri niðurstöðu að virkjunin hefur enga jákvæða kosti fyrir utan þá einu að veita nokkrum mönnum vinnu og gefa raforku til stóriðjuframkvæmda. Menn getað ritað nafn sitt í sögubækur um ókomin tíma og orðið goðsagnir  næstu kynslóða ef þeir ákveða að hafna þessum (ill)virkjanaframkvæmdum. Sjálfur er ég tilbúinn til þess að borga skatt sem kemur í veg fyrir svona virkjanaframkvæmdir. Landinn er ekki svo illa staddur fjárhagslega í dag að hann þurfi að nýta allar þær auðlindir sem til eru í landinu bara til þess að geta keypt sér nýja óþarfa hluti sem verða síðan úreltir á morgun en náttúran sjálf verður seint úrelt að mínu mati.

Það sem kemur mér á óvart fyrir utan þessa nýju ákvörðun sveitarstjórnar er það hversu fasteignagjöldin eru ótrúlega lág. Ásahreppur á víst að fá 25 - 30 milljónir á ári. Hrepparnir gera sér eflaust ekki grein fyrir því að þessar upphæðir ná ekki einu sinni upp í 1% af þeim gróða sem álrisarnir eiga eftir að fá í sinn vasa af þessu braski.

Ég ætla að tippa á það að Landsvirkjun verði bráðum einkavædd og bankarnir verða líklegustu kaupendurnir. Þjóðin á bara að borga framkvæmdirnar og síðan verður fyrirtækið selt langt undir raunvirði. heheh!